Ռուսական առաջին ալիքի սկանդալային տեսանյութի վերաբերյալ նախագահականն ասելիք չունի

ՀՀ նախագահի աշխատակազմի ղեկավար Վիգեն Սարգսյանը խուսափում է լրագրողների հետ զրույցից: Այսօր նա ԱԺ էր ներկայացել` 2014թ. բյուջեի քննարկումներին մասնակցելու: Նրա զեկուցումից հետո լրագրողները միջանցքում ընդամենը մեկ հարցի պատասխան փորձեցին ստանալ` ինչպե՞ս կմեկնաբանեք ռուսական առաջատար հեռուստաընկերության անդրադարձը ՀՀ-ի` Մաքսային միությանն անդամագրվելու հարցին, ըստ որի` ՀՀ-ի ցանկությունն անդրամագրվել ՄՄ-ին, այդպես էլ կմնա ցանկություն`Արցախի հարցի հետ կապված:

«Գոյություն ունի նախագահի մամուլի ծառայություն, այդ հարցը ուղղեք նրանց»,- ասաց նախագահի աշխատակազմի ղեկավարը: «Բայց այդ ծառայությունը լռում է»,- շեշտեցին լրագրողները: Վիգեն Սարգսյանը չպատասխանեց ու հեռացավ:

Հարկ ենք համարում նշել, որ նախագահի մամուլի ծառայությունը չի պատասխանում ո'չ բջջային, ո'չ էլ քաղաքային հեռախոսահամարներին: Երեկ էլ նախագահի մամուլի քարտուղար Արման Սաղաթելյանը թվիթերյան իր էջում, անդրադառնալով բելառուսական հեռուստաընկերության տեսանյութին, նշել է, որ «շրջանառվող կադրում նախագահն ընթերցում է: Մնացածն օպերատորական ոչ պրոֆեսիոնալ դիտանկյունի խնդիր է»: