Կոմպոզիտորների միության նախագահը պետք է լինի կատարող, ոչ թե թելադրող

Երեկ Կոմպոզիտորների միության նախագահ ընտրվեց Արամ Սաթյանը:

Yerkir.am-ի հետ զրույցում կոմպոզիտոր Մարտին Վարդազարյանը նշեց, որ նորընտիր նախագահը թեեւ ուշացումով, բայց միությունը պետք է վերադարձնի ոչ միայն օրինական, այլ նաեւ ստեղծագործական դաշտ: Ըստ նրա` նորընտիր նախագահը նախ պետք է վարչություն ընտրի, որի անդամը կլինի նաեւ ինքը, եւ կլինի կատարողը, ոչ թե թելադրողը:

«Այս տարիների ընթացքում օրինական ընտրված վարչություն, վերստուգիչ հանձնաժողով չի եղել, եւ պատահական հրավիրել մի քանի հոգի ու վարչության անվան տակ որոշումներ կայացնել, ճիշտ չէ: Պետք է այնպես անել, որ հայկական երաժշտությունը հնարավորություն ունենա երեւալու աշխարհին այն որակով, տեսակով ու չափով, որով օժտված են մեր կոմպոզիտորները: Ափսոս է»,- ասաց Վարդազարյանը:

Նրա կարծիքով` հայ երաժշտըությունն արժանի է ավելի լայն քարոզման, քան այսօր կա: Վարդազարյանի հավաստմամբ` տարվա ընթացքում մեկ-երկու համերգ կազմակերպելով` երաժշտությունն իր կենդանության մասին չի փաստում, այլ ուղղակի գրվում է, թե այսինչ բանն արվել է: «Իսկ համերգներ կազմակերպել` ցույց տալու համար, որ դա արվել է, չի կարելի: Յուրաքանչյուր համերգի վրա պետք է աշխատել, ծրագիր ընտրել»,- նշեց կոմպոզիտորը: