Զարմացա Վարդան Մինասյանի որոշումից. Յուրա Մովսիսյան

Ֆուտբոլի Հայաստանի ազգային հավաքականի և Մոսկվայի «Սպարտակ»-ի հարձակվող Յուրա Մովսիսյանը իր ֆեյսբուքյան էջում անդրադարձել է ազգային հավաքականի գլխավոր մարզիչ Վարդան Մինասյանի որոշմանը՝ պայմանագրի ժամկետը լրանալուց հետո չգլխավորել թիմը:

«Շատ զարմացա, երբ լսեցի մեր ազգային հավաքականի գլխավոր մարզիչ Վարդան Մինասյանի հեռանալու մասին տխուր լուրը:  Ես գիտեմ, թե որքան սիրված է նա ֆուտբոլիստների և երկրպագուների  կողմից: Ես հիասթափված էի` լսելով այս լուրը, բայց միևնույն ժամանակ  հարգում եմ նրա որոշումը: Ցանկանում եմ շնորհակալություն հայտնել լավագույն մարզիչներից մեկին, ում գլխավորությամբ  երբեւէ մարզվել եմ: Նա հիանալի մարզիչ է և հրաշալի մարդ: Լավագույն մաղթանքներս նրան իր պրոֆեսիոնալ կարիերայում: Նա հրաշալի ղեկավար է եղել  հավաքականի  բոլոր ֆուտբոլիստների համար: Հուսով եմ՝ երբևէ, որևէ թիմում ես կրկին կաշխատեմ Մինասյանի հետ: Առանց Վարդան Մինասյանի մենք չէինք հասնի այն արդյունքների, որն ունենք հավաքականում և մեր ակումբներում: Շնորհակալությու՛ն, մարզիչ»,- գրել է Մովսիսյանը: