Զորի Բալայանն անվրեպ ձեւ է գտել. Վարդան Դեւրիկյան

Զորի Բալայանի քայլը յուրօրինակ շանտաժի ձեւ է` ինչպես Մոլդովայի պարագարում. ճիշտ քաղաքականություն է. անդրադառնալով ՌԴ նախագահ Վլադիմիր Պուտինին ուղղված Զորի Բալայանի բաց նամակին` yerkir.am-ի հետ զրույցում նման կարծիք հայտնեց գրականագետ Վարդան Դեւրիկյանը:

Դեւրիկյանի հավաստմամբ, այսպես, թե այնպես` պարզ է, որ Ղարաբաղը ՌԴ-ի կազմի մեջ չի կարող մտնել, բայց, այնուամենայնիվ, որպես վախեցնելու եւ Ադրբեջանին ու ռուսներին սիրաշահելու քայլ` միակ անվրեպ ճանապարհն է:

«Սա ընդհանուր օրինաչափություն է, եւ չճանաչված պետություններից շատերն են նման քայլի դիմում` մյուսներին ուղղակի սթափ պահելու համար: Պարզ է, որ որքան էլ Ղարաբաղը ցանկանա, չի կարող մտնել ՌԴ կազմի մեջ, քանի որ դրանով ՌԴ-ն մեծ բարդությունների առջեւ կկանգնի. ՌԴ-ն Աբխազիային չընդունեց որպես իր մի մաս, պարզապես անկախությունը ճանաչեց: Դա դրական առումով սպառնալիքի միջոց է ու Զորին անվրեպ ձեւ է գտել»,-ասաց Դեւրիկյանը:

Հիշեցնենք, որ Բալայանը բաց նամակ է գրել ՌԴ նախագահ Վլադիմիր Պուտինին եւ, ըստ էության, մի շարք փաստարկներ բերել, ըստ որոնց` Ղարաբաղը պատկանում է Ռուսաստանին՝ Գյուլիստանի պայմանագրով: Զորի Բալայանը Պուտինին կոչ է անում այցելել Ղարաբաղ եւ այն ճանաչել որպես Ռուսաստանի մաս: