Խաչիկյանը կարող է չվերականգնել պետությանը հասցված վնասը

Վաղվանից ուժի մեջ կմտնի ՀՀ անկախության հռչակման 22-րդ տարեդարձի առթիվ ՀՀ նախագահի` համաներում հայտարարելու մասին որոշումը: Ի տարբերություն  մինչ այս իրականացված համաներումների, սա  ամենատարածականն է: Ներառված են բազմաթիվ հոդվածներ, որոնք նախորդ համաներումներում չկային:

Yekir.am-ը պարզել է, որ եթե Սոցիալական ապահովության ծառայության նախկին պետ Վազգեն Խաչիկյանը դատապարտվի ազատազրկման, ապա նրա նկատմամբ` կախված պատժաչափից, համաներումը կտարածվի լիովին կամ մասնակի` առանց պետությանը հասցված վնասը վերականգնելու:

Սակայն, օրինակ, եթե նրան դատապարտեին նախորդ համաներումների տարիներին, պատճառված վնասը վերականգնելու դեպքում միայն  նրա նկատմամբ կտարածվեր  համաներման ակտը: Այս համաներումը նման արգելք չի նախատեսում:

Նույնը վերաբերում է Խաչիկյանի  հետ ամբաստանյալի աթոռին հայտնված` սոցիալական ապահովության ծառայության մյուս աշխատակիցներին:

Հիշեցնենք, որ  Վազգեն Խաչիկյանը և սոցիալական ծառայության ևս 12 աշխատակիցներ մեղադրվում են  բազմաթիվ քաղաքացիների կենսաթոշակները և նպաստները յուրացնելու մեջ:  Ըստ մեղադրանքի` նրանց կողմից պետությանը պատճառված վնասը կազմում է 289956681 ՀՀ դրամ:

Սակայն ենթադրությունների համար վաղ է,  քանի որ դատավարությունը դեռևս  ընթացքի մեջ է, վկաների հարցաքննության փուլն անգամ ավարտված չէ,  իսկ դատավճիռն, աստված գիտի' երբ կլինի:

Ի դեպ' Խաչիկյանի գործով այսօրվա  դատական նիստին ընդհանրապես վկաներ չէին ներկայացել, ինչը և նիստը հերթական անգամ հետաձգելու առիթ հանդիսացավ:

Նման տեմպով շարունակելու դեպքում' մոտ ապագայում դատավճռի սպասել պետք չէ: