Համաներումը ուժի մեջ կմտնի վաղվանից

Արդեն տեղեկացրել ենք, որ ԱԺ-ում միաձայն ընդունվեց ՀՀ անկախության հռչակման 22-րդ տարեդարձի առթիվ ՀՀ նախագահի` համաներում հայտարարելու մասին որոշման նախագիծը:

Լրագրողների հետ զրույցում արդարադատության նախարար Հրայր Թովմասյանը տեղեկացրեց, որ համաներումն ուժի մեջ կմտնի վաղվանից եւ կիրականացվի մինչեւ դեկտեմբերի 25-ը: Ըստ նախարարի` ազատ կարձակվի մոտ 500-600 մարդ, սակայն համաներումը կտարածվի 1000-ից ավելի անձանց վրա, քանի որ համաներումը դիտարկվում է հետեւյալ կերպ` պատժից ազատում եւ պատժի չկրած մասի կրճատում:

Նախարարի խոսքերով` քրեակատարողական հիմնարկի ղեկավարները վերցնելու են բանտարկյալների գործերը, մեկ առ մեկ նայելու են, քննարկելու ու որոշումներ կայացնելու: Առաջին հերթին անդրադարձ կկատարվի այն անձանց, որոնք պետք է ազատ արձակվեն, հետո նոր` այն մարդկանց, որոնց պատժաչափը պետք է կրճատվի: