Վրաստանը խստացնում է լեզվի չափորոշիչները

Վրաստանում պետական լեզվի չափանիշների խախտման համար հնարավոր է կիրառվեն տուգանքներ: Ըստ akhaltskha.net-ի` օրինագիծն արդեն պատրաստ է, որին խորհրդարանը կանդրադառնա առաջիկայում: Եթե օրենքն ընդունվի, ապա Վրաստանի յուրաքանչյուր քաղաքացի, ով աշխատում է պետական հաստատություններում, պարտավոր կլինի լավ իմանալ պետական լեզուն, հակառակ դեպքում` տուգանքները կդառնան անխուսափելի:

Ըստ  օրինագծի նախնական տեսքի` Վրաստանի այն բնակիչը, ով վրաց լեզվով չի ստացել կրթություն, պիտի հանձնի հատուկ քննություն: Փոփոխությունը վերաբերում է նաեւ հանրային աշխատողներին: Լեզվի չափանիշների խախտման դեպքում կմտցվեն տուգանքներ, իսկ երկրորդ խախտման դեպքում տուգանքը կդառնա կրկնակի:

Օրինագծի գլուխներից մեկը վերաբերում է նաեւ լրատվամիջոցներին: Եթե լրատվամիջոցների ներկայացուցիչները խախտեն վրաց գրական լեզվի չափանիշները առաջին անգամ տուգանվելու են 1000-5000 լարի, իսկ սխալը կրկնելու դեպքում' 10 000 լարի:

Նախագիծը հավանության է արժանացել և  ընդունվել է գիտությունների ակադեմիայի կողմից:

Տվյալ օրինագծի ընդունման դեպքում կրկին խիստ անհրաժեշտ ու հրատապ է դառնում Սամցխե-Ջավախքում հայերենին տարածաշրջանային լեզվի կարգավիճակ շնորհման հարցը: