ՀԱԿ-ը Գեւորգ Կոստանյանին շանս կտա. Լեւոն Զուրաբյան

Գլխավոր դատախազի թեկնածու Գեւորգ Կոստանյանի հանդիպումը ԱԺ ՀԱԿ խմբակցության հետ տեւեց շուրջ մեկ ժամ: Հանդիպումից հետո Կոստանյանը կրկին հրաժարվեց պատասխանել լրագրողների հարցերին:

Իսկ ԱԺ ՀԱԿ խմբակցության ղեկավար Լեւոն Զուրաբյանը լրագրողներին հայտնեց, որ հանդիպման ընթացքում «բարձրացրել են այն հարցերը, որոնք հուզում են բոլոր քաղաքացիներին»` Մարտի 1-ի սպանությունների չբացահայտման, Տիգրան Առաքելյանի ազատ արձակման, կոռուպցիայի հաղթահարման, մասնավորապես` Տիգրան Սարգսյանի անվան հետ կապված օֆշորային հարցի, ՍԴՀԿ-ի հետ կապված վերջին իրադարձությունների, նաեւ միասնական քննչական մարմնի մասին:

«Լինելով գրագետ իրավաբան` նա ընդամենը ասաց, որ այս բոլոր հարցերը պետք է ուսումնասիրի»,- նշեց Զուրաբյանը, երբ լրագրողները փորձեցին պարզել, թե ինչպիսին էր հարցերի վերաբերյալ Կոստանյանի դիրքորոշումը եւ ինչ խոստացավ:

ՀԱԿ խմբակցության ղեկավարը նշեց, որ Կոստանյանի` դատախազ նշանակվելու հարցն արդեն պարզ է, եւ «հիմա մենք պետք է առաջնորդվենք անմեղության կանխավարկածով, պետք է ինչ-որ ժամանակ հետեւենք նշանակվելիք գլխավոր դատախազի գործունեությանը»:

«Իհարկե, ինքը բոլոր առումներով, իր որակներով ավելի ընդունելի է, քան Աղվան Հովսեփյանը, բայց դա մեզ համար որեւէ նշանակություն չունի, որովհետեւ մենք հասկանում ենք, թե ինչ համակարգում է ինքն աշխատելու, նույն ավազակապետական համակարգում, նույն բռնապետի օրոք: Մենք պատրանք չունենք, որ այդ միջավայրում ինքը կարող է իրեն դրսեւորել որպես օրինականության պահապան, բայց, մյուս կողմից, լսելով իր մոտեցումներ մենք ինչ-որ ժամանակ պետք է նրան տանք: Մեր գնահատականները պետք է լինեն հիմնավորված: Կանխավ, մեր գնահատականները հիմնելով այս արատավոր քաղաքական համակարգի գնահատականի վրա, մենք չեն կարող,  դա կլինի ոչ կոնստրուկտիվ մոտեցում: Մենք ցանկանում ենք ցանկացած մարդու շանս տալ եւ այդ շանսը տալիս ենք Գեւորգ Կոստանյանին»,- ասաց Զուրաբյանը եւ ընդգծեց, որ հենց այնպես, առանց շատ կոնկրետ հիմքերի նրան չեն քննադատի:

Նա նշեց, սակայն, որ այս պահի դրությամբ չի կարող ասել, թե ՀԱԿ խմբակցությունն ինչպես է քվեարկելու: