Եթե Սեդրակյանին վաղն ազատ արձակեն` Հայրիկյանը չի բողոքի

ԱԻՄ առաջնորդ Պարույր Հայրիկյանն այսօր լրագրողների հետ հանդիպման ժամանակ հայտարարեց, որ իրեն քիչ է հետաքրքրում իր դեմ կատարված մահափորձի գործով  դատարանի կայացրած վճիռը:

Նա հերթական անգամ ընդգծեց, որ նախաքննական մարմինը թերացել է գործը մինչև վերջ բացահայտելու գործում: «Պետք է պարզվեր, թե որտեղից է պատվիրատու կոչված մարդու մոտ վերջին մեկ տարվա ընթացքում գոյացել երեք մլն դոլար, որը նա  խաղացել է, իսկ դրանից 250 հազարը` պարտվել:  Որտեղից են այդ գումարները հայտնվել մի մարդու մոտ, ով չի աշխատում, բայց ում ավտոմեքենան Հայրիկյանից թանկ արժե»,- ասաց նա:

Ըստ նրա` դատարանը միացավ ամբաստանյալներին և հարցաքննության չկանչեց նախաքննության ժամանակ որպես վկա քննված այն մարդկանց, ովքեր 100000 ԱՄՆ դոլար էին  նվիրել պատվիրատու ճանաչված անձին:  

Հարցին` արդյո՞ք ներկայումս իրեն վտանգ սպառնում է, Հայրիկյանը պատասխանեց. «Եթե մեր պետական մարմիները դեռ շարունակում են ուշադրություն դարձնել իմ   անվտանգությանը, նշանակում է նրանք  մի բան գիտեն:  Մեր ժողովրդին վտանգ է սպառնում, նշանակում է ինձ էլ է վտանգ սպառնում»:

Անդրադառնալով Սեդրակյանի պաշտպան Ա. Սիրունյանի` վճիռը բողոքարկելու որոշմանը, նա ասաց, որ ինքը կողջունի բոլոր այն քայլերը, որոնք ուղղված կլինեն այդ մարդկանց պաշտպանությանը: «Եթե վաղը նրանց ազատ արձակեն,  հավատացած եղեք` ես չեմ բողոքի. երեք մարդ` այս կողմ-այնկողմ` ի՞նչ տարբերություն, փողոցում նրանց նման շատ կան»,- ասաց Հայրիկյանը: