Օջալանին հնարավոր է ազատ արձակեն

Մարմարա ծովում գտնվող Իմրալը կղզու բանտում ցմահ բանտարկված` Քրդական բանվորական կուսակցության առաջնորդ Աբդուլլահ Օջալանը հնարավոր է ազատ արձակվի առողջական խնդիրների պատճառով: Այդպիսի հեռանկարի մասին տեղեկացրել է Իրաքի նախագահ Ջալալ Թալաբանիի Քրդստանի հայրենասիրական  միության տեղեկատվական կայքը. հայտնում է ИТАР-ТАСС-ը:

Թուրքիայում վերջին շրջանում եղել են դեպքեր, երբ բանտարկյալներն ազատ են աձակվել առողջական քրոնիկ խնդիրներ ունենալու պատճառով: Այդ նախադեպերը հնարավորություն են տվել ՔԲԿ-ի քաղաքական թեւին` Քրդստանի ընկերակցությունների միությանը եւ քրդամետ «Խաղաղություն եւ ժողովրդավարություն» կուսակցությանը քայլեր ձեռնարկելու, որ իշխանությունները հետազոտեն Օջալանին եւ բժշկական զեկույց ներկայացնեն:

Քուրդ գործիչները համարում են, որ իրենց առաջնորդի ազատ արձակումը կնպաստի Թուրքիայում քրդական հարցի խաղաղ կարգավորմանը: