Հայ ճանաչված սոպրանոները հանդես կգան հայաստանյան ելույթով

Ալեքսանդր Սպենդիարյանի անվան օպերայի եւ բալետի ազգային ակադեմիական թատրոնն անմասն չի մնա Արամ Խաչատրյանի 110-ամյակին նվիրված միջոցառումներից:

Մեծանուն կոմպոզիտորի հոբելյանին նվիրված` մինչեւ տարեվերջ թատրոնում կընթանան «Սպարտակ», «Գայանե», «Ձոն հավերժության» բալետները, իսկ «Համերգ ճեմասրահում» նախագծի շրջանակներում կլինեն Արամ Խաչատրյանի անվան եռյակի համերգները. այս մասին yerkir.am-ին տեղեկացրին օպերայի եւ բալետի ազգային ակադեմիական թատրոնից:

Թատրոնի հոբելյանական 80-րդ թատերաշրջանն այս տարի կմեկնարկի սեպտեմբերի 20-ին` Արմեն Տիգրանյանի «Անուշ» օպերային ներկայացմամբ:

Տարվա ընթացքում թատրոնը հանդես կգա Ռիխարդ Վագների 200-ամյակին նվիրված գալա համերգով, որին կմասնակցեն ճանաչված հայ սոպրանոներ Աննա Կասյանը (Ֆրանսիա), Ռոզի Անուշ Սվազլյանը (ԱՄՆ) եւ Հրաչուհի Բասենց Խումարյանը (Գերմանիա):