Գուրգեն Մարգարյանի հայրը ինքնասպանության փորձ է կատարել

Pastinfo.am-ի տեղեկություններով` այս գիշեր Երևանի Մուշ թաղամասում գտնվող իր տանը ինքնասպանության փորձ է արել Հունգարիայում ադրբեջանցի ոճրագործ Ռամիլ Սաֆարովի կողմից սպանված` ՀՀ ԶՈՒ սպա Գուրգեն Մարգարյանի հայրը՝ Արտուշ Մարգարյանը: Կայքի տեղեկություններով` նա դանակով մի քանի հարվածներ է հասցրել իր մարմնին, կտրել երակները։ Լուսադեմին Ա.Մարգարյանը տեղափոխվել է «Մալաթիա» բժշկական կենտրոն:

Կենտրոնի բուժգծով մասի տնօրեն Ռոբերտ Կուրղինյանը yerkir.am-ին տեղեկացրեց, որ Մարգարյանին արդեն վիրահատել են, նրա կյանքին վտանգ չի սպառնում: «Վիրահատությունը քիչ առաջ են ավարտել, նա դեռ քնած է: Մեկ-երկու օր հետվիրահատական պալատում պահելուց հետո կտեղափոխենք պալատ: Ամեն ինչ նորմալ է»,- ասաց Կուրղինյանը:

Հարցին, թե ի՞նչ վիճակով է Մարգարյանը տեղափոխվել հիվանդանոց, Կուրղինյանը պատասխանեց, որ դա արդեն պետք է քննիչները փաստեն: