Նոր պայուսակներ եւ գրենական պիտույքներ` Արին գյուղի դպրոցականներին

«Հայաստան» համահայկական հիմնադրամը Մեծ Բրիտանիայի հայ համայնքի օժանդակությամբ դպրոցական պայուսակներ եւ գրենական պիտույքներ է նվիրաբերել Վայոց Ձորի մարզի Արին գյուղի դպրոցի 52 աշակերտի:

Հիմնադրամի Մեծ Բրիտանիայի տեղական մարմինը կրթական եւ առողջապահական խոշոր ծրագրերին զուգընթաց վերջին 10 տարում օժանդակել է Շիրակի, Լոռու, Տավուշի, Արագածոտնի եւ Վայոց Ձորի մարզերի ավելի քան 2000 աշակերտի:

Նոր ուսումնական տարվան ընդառաջ` այս տարի եւս 52 դպրոցական ստացել է անհրաժեշտ գրենական պիտույքներ: Հիմնադրամի Մեծ Բրիտանիայի տեղական մարմնի ատենապետ Արմինե Կարապետին համարում է, որ ուսումնական տարվա սկզբին մի քանի տասնյակ ընտանիքների նյութական հոգսը թեթեւացնելը ոչ միայն կենցաղային, այլ նաեւ բարոյական աջակցություն է: