Պետությունը պետք է մոբիլիզացիոն քաղաքականություն իրականացնի. Վազգեն Սաֆարյան

Սակագների բարձրացումը կայացել է, և այն հասարակության մեջ լարվածությունը մեծացրել է. լրագրողներին այսօր ասաց հայրենական ապրանք արտադրողների միության նախագահ Վազգեն Սաֆարյանը:

Նրա խոսքերով` դեռ մեկ տարի առաջ էր հասարակությունը լսում գազի թանկացման մասին, այսինքն` դա նորություն չէր այլեւս: Սակայն, նշեց բանախոսը, որպեսզի հնարավորինս մեղմվի գազի և էլեկտրաէներգիայի գնի բարձրացումը, ինքն առաջարկում է այլընտրանքային էլեկտրաէներգիայի գործածումը: Բացի այդ, Սաֆարյանը համոզմունք հայտնեց, որ միայն Ռուսաստանի հետ համագործակցությամբ հնարավոր կլինի տնտեսությունը զարգացնել:

«Եթե մենք նայում ենք եվրամիության երկրների հետ մեր արտահանման ծավալներին, դրանք հիմնականում գունավոր մետաղների հումքերն են, որոնք նվազել են: Իսկ ինչ վերաբերվում է մաքսային միության երկրների արտահանած ապրանքների ծավալին, աճ է նկատվել»-, ասաց Սաֆարյանը:

Նա գտնում է, որ պետությունը պետք է մոբիլիզացիոն քաղաքականություն իրականացնի, և այսօր օրվա օրակարգային հարց է դարձել այդ ուղղությամբ բարեփոխումների իրականացումը: