Վանաձորում մեկնարկել է Ստեփան Սարգսյանի անվան ըմբշամարտի մրցաշարը

Վանաձորում մեկնարկել է Օլիմպիական խաղերի փոխչեմպիոն, աշխարհի եռակի գավաթակիր,  Ստեփան Սարգսյանի անվան ըմբշամարտի մեծահասակների 18-րդ մրցաշարը, որին մասնակցում են  11 երկրների շուրջ 150 մարզիկներ:

Ազատ ոճի ըմբշամարտի Հայաստանի հավաքականի գլխավոր մարզիչ Արայիկ Բաղդադյանը, ով զբաղվում է մրցաշարի կազմակերպչական աշխատանքներով Yerkir.am-ի հետ զրույցում նշեց, որ առաջին դեպքն է, որ այսքան մարզիկներ են գալիս մրցաշարին:

«Այս տարի մրցումներին մասնակցում են շատ անվանի մարզիկներ՝ տարբեր երկրներից: Ես առաջարկեցի Ստեփան Սարգսյանին, որպեսզի մրցումներն անցկացվի հենց այս ժամանակ՝ աշխարհի առաջնությունից առաջ, քանի որ վստահ էի, որ շատ մարզիկներ կգան: Սպասումներս արդարացան: Առաջին անգամ այս մրցաշարին գալիս են այսքան շատ մարզիկներ, բոլորը  ուժեղագույններն են՝ Ռուսաստանից, ԱՄՆ-ից, Վրաստանից և այլն: Հայաստանից մասնակցելու են 35 մարզիկներ: Չեն մասնակցի մեր լավագույն ըմբիշներից 66կգ քաշային, Եվրոպայի չեմպիոն Դավիթ Սաֆարյանը, ով արդեն երկու մրցաշարի մասնակցել է, և  Եվրոպայի փոխչեմպիոն Մուսա Մուրթազալիևը, ով ունքի խորը վնասվածք ստացավ մարզման ժամանակ: Այս առաջնությունից հետո կձևավորվի Հայաստանի հավաքականը, որը կմեկնի աշխարհի առաջնության»,-ասաց նա:

Մրցաշարը մեկնարկել է այսօր՝ օգօստոսի 3-ին, կավարտվի վաղը: