Սիրիացի գրոհայինները 200 քուրդ են պատանդ վերցրել

Քրդերի ինքնապաշտպանական ուժերի եւ «Ալ Քաիդա»-ի հետ կապ ունեցող ծայրահեղական խմբավորումների միջեւ հակամարտությունը տեղափոխվել է Սիրիայի հյուսիսային շրջաններ` Հալեպի  տարածք: Երեկ քաղաքի մոտակայքում գտնվող քրդական 2 գյուղի 200 բնակիչ է պատանդ վերցվել: Թե նրանց ազատ արձակման համար ինչ պայմաններ են առաջադրել գրոհայինները, առայժմ հայտնի չէ. տեղեկացնում է ИТАР-ТАСС-ը:

Քրդական գյուղերը գտնվում են ռազմավարական նշանակության բարձունքների վրա, որոնցից հնարավոր է վերահսկել Թուրքիայի հետ սահմանակից Աազազ քաղաք տանող ճանապարհը: Դրանով առաջին անհրաժեշտության մթերք եւ պարագաներ են հասցվում Հալեպ:

Իսլամականներն այդ շրջանում գործողություններ են սկսել երկուշաբթի օրվանից: Քրդերի հետ ընդհարումների ժամանակ զոհվել է 16 քուրդ, նրանցից 11-ը` աշխարհազորային, եւ 10 գրոհային, այդ թվում` նրանց հրամանատարը:

Անմիջապես Հալեպում քրդերը պաշտպանվում են երկու թաղամասում` Շեյխ Մաքսուդ եւ Աշրաֆիա: