Հայ վարորդի վերաբերյալ ՀՀ օմբուդսմենը նամակ է հղել ՌԴ գործընկերոջը

Վթարի պատճառ դարձած հայ վարորդի վերաբերյալ ՀՀ օմբուդսմենը  նամակ է հղել ՌԴ գործընկերոջը: Նամակում ասվում է.

«Հարգարժա'ն պարոն Լուկին

Ընդունեք իմ խորին ցավակցությունները հուլիսի 13-ին տեղի ունեցած ճանապարհատրանսպորտային պատահարի և 18 հոգու մահվան կապակցությամբ:

ՀՀ քաղաքացի Հրաչյա Հարությունյանը, ով մեղադրվում է երթևեկության կանոնների խախտման մեջ, որը հանգեցրել է 2 և ավելի մարդկանց մահվան, դատարանի առջեւ է կանգնել ստորացուցիչ տեսքով` կանացի խալաթով:

ՌԴ Սահամանադրությունն ենթադրում է, որ անձի արժանապատվությունը պաշտպանվում է պետության կողմից և ոչինչ չի կարող հիմք հանդիսանալ այն նսեմացնելու համար: ՌԴ Սահմանադրության 21-րդ հոդվածը երաշխավորում է, որ անձի արժանապատվության իրավունքը ցանկացած անհատի իրավունքն է`  ոչնչով չսահմանափակված:

Հաշվի առնելով այն հանգամանքը, որ պատահարը տեղի է ունեցել Ձեր իրավասության ներքո գտնվող տարածքում, խնդրում ենք Ձեզ ուսումասիրել Հ. Հարությունյանի նկատմամբ ստորացուցիչ վերաբերմունքի ու նման տեսքով դատարանում ներկայացնելու պատճառները և Ձեր լիազորությունների սահմանում անհրաժեշտ միջոցներ ձեռնարկել Հ.Հարությունյանին օգնելու համար:

ՌԴ և ՀՀ օմբուդսմենների արդյունավետ համագործակցությանը կարևորություն տալով` նախապես ցանկանում եմ երախտագիտություն հայտնել ցուցաբերած օգնության համար:

Հարգանքներով`   Կարեն Անդրեասյան»: