Եկել է պատասխան տալու ժամանակը. վարչապետ

Կառավարության այսօրվա նիստի օրակարգային հարցերին անցնելուց առաջ վարչապետ Տիգրան Սարգսյանն անդրադարձավ հանրապետության նախագահի հրավիրած հայտնի խորհրդակցությանը, որը տեղի էր ունեցել կառավարությունում եւ նվիրված էր պետական բյուջեի միջոցների ոչ արդյունավետ ծախսմանը:

Վարչապետն ասաց, որ այդ խորհրդակցությունից հետո բավականին մեծ ծավալի աշխատանք է կատարել, ընդունվել են բազմաթիվ որոշումներ, տրվել են հանձնարարականներ, գերատեսչությունների աշխատակիցներն անցել են վերապատրաստում:

«Եկել է պատասխան տալու ժամանակը, եւ այսուհետեւ մենք լինելու ենք չափազանց խիստ ցանկացած խախտման վերաբերյալ»,- նշեց Տիգրան Սարգսյանը` հավելելով, որ ֆինանսների նախարարությունը իրականացրել է դիտարկումներ, թե ինչ իրավիճակ է ստեղծվել այսօր: Վարչապետը հայտնեց կառավարության անդամներին, որ այդ բոլոր դիտարկումները տրամադրվելու են նրանց`ուսումնասիրման:

Նա հանձնարարեց ֆինանսների նախարար Դավիթ Սարգսյանին այսուհետեւ վերահսկողության ծառայության կողմից իրականացված բոլոր բացահայտումների ակտերն անհապաղ ուղարկել իրավապահ մարմիններին, միեւնույն ժամանակ, պարբերաբար` տարեկան ծրագրին համահունչ, յուրաքանչյուր հերթական ստուգումն ավարտվելուց անմիջապես հետո ակտերը կազմել ու արդյունքները ներկայացնել հանրությանը:

«Կառավարության հաջորդ նիստերից մեկում կանդրադառնանք դիտարկումների արդյունքներին` ըստ գերատեսչությունների, եւ կտեսնենք` որտեղ ինչ իրավիճակ է ստեղծվել, որտեղ ինչ բարելավումներ կան, իսկ որտեղ է իրավիճակը դեռեւս վատ վիճակում մնում»,- ասաց Տիգրան Սարգսյանը: