Պոլսահայ երգչուհի Սիպիլը աջակցելու է Երևանի համար 101 մանկապարտեզին

Երևանի քաղաքապետարանի ենթակայության համար 101 մանկապարտեզի համերգային  դահլիճը նորոգվելու է պոլսահայ երգչուհի Սիպիլի աջակցությամբ։

Դեռևս 2012 թվականի սեպտեմբերին երգչուհին Երևանում կազմակերպել էր իր «Սիպիլ» ձայնասկավառակի բարեգործական վաճառքը՝ նպատակ ունենալով  հասույթը տրամադրել Երևանի մանկապարտեզներից մեկին։ 

 Երևանի քաղաքապետարանի հանրակրթության վարչության պետ Գայանե Սողոմոնյանի խոսքով՝ երգչուհու ցանկությամբ մանկապարտեզի ընտությունը կատարվել է Նոր Նորք վարչական շրջանում գործող մանկապարտեզների ցանկից. որոշումը կայացվել է հաշվի առնելով մանկապարտեզի շենքային պայմաններն ու հաճախելիությունը։ Երևանի N101 մանկապարտեզ է հաճախում ավելի քան 230 երեխա։

«Ձեռքիցս եկածի չափով որոշեցի աջակցել։ Որքան երաժշտություն եմ սիրում, ավելին երեխաներին եմ սիրում. Համադրելով՝ որոշեցի հենց մանկապարտեզի դահլիճի նորոգումը հոգալ»,- նշել է երգչուհին, ով այս օրերին Երևանում է և այցելել է N101 մանկապարտեզ։