Երուսաղեմի պատրիարքի գահակալությունը ոչ մի օրենքի չի հակասում

Իսրայելի կողմից Երուսաղեմի հայոց պատրիարքի թեկնածուին հավանություն տալը պրոտոկոլային է, պարտադիր պայման չէ. yerkir.am-ի խնդրանքով մեկնաբանելով լուրը, թե Իսրայելը չի ճանաչում Երուսաղեմի հայոց նոր պատրիարքին, ասաց Երուսաղեմի հայոց պատրիարքարանի կալվածքների տեսուչ տեր Բագրատ վարդապետ Պերճեքյանը:

Yerkir.am-ի հարցին, թե իսրայելական կողմը, չճանաչելով հայոց նոր պատրիարքին, կարո՞ղ է հակասության մեջ մտնել Երուսաղեմի պատրիարքարանի եւ Էջմիածնի հետ, եւ հայ-հրեական հարաբերությունները կարո՞ղ են լարվել, Բագրատ վարդապետը պատասխանեց, որ Իսրայելն ինքը ունի բազմաթիվ խնդիրներ, իսկ հայ պատրիարքի գահակալության հետ որեւէ բողոք կամ առարկություն իսրայելական կողմից իրենք չեն ստացել:

«Մենք նաեւ տեղեկացած ենք, որ իսրայելական կողմը մոտ օրերս պիտի ճանաչի Երուսաղեմի հայոց պատրիարքին, դրա համար գահակալությունը տեղի է ունեցել, որը ոչ մի օրենքի չի հակասում»,- պարզաբանեց տեր Բագրատ վարդապետ Պերճեքյանը:

Ի դեպ, մինչ Երուսաղեմի հայոց պատրիարքարան զանգելը, այս հարցի առնչությամբ մեկնաբանություն ստանալու խնդրանքով դիմել էինք Էջմիածնի մամլո դիվանի պատասխանատու տեր Վահրամ քահանա Մելիքյանին: Նա պատասխանեց, որ մինչ օրս չի եղել մի դեպք, որ Երուսաղեմի պատրիարքի գահակալությունը տեղի ունենա առանց իսրայելական կողմի համաձայնության, եւ որ Երուսաղեմի հայոց պատրիարքի գահակալությունը հետաձգվել է մինչ երեկ, պատճառը դա էլ կարող էր լինել: Տեր Վահրամը նշեց, որ եթե պատրիարքի գահակալությունը տեղի է ունեցել, ուրեմն այդ հարցը լուծում է ստացել, եւ իսրայելական կողմը տվել է իր համաձայնությունը:

Հիշեցնենք, որ Երուսաղեմի բոլոր քրիստոնեական հարանվանությունները աշխատում են իրենց առանջորդ նշանակել այնպիսի անձանց, որոնց հարցում համաձայնություն է լինում Իսրայելի, Հորդանանի եւ Պաղեստինյան ինքնավարության կողմից, ինչը նոր եպիսկոպոս եւ պատրիարք նշանակելը դարձնում է լուրջ դիվանագիտական խնդիր:

Նուրհան արքեպիսկոպոսի թեկնածությունը հավանության է արժանացել միայն Պաղեստինի ու Հորդանանի կողմից, սակայն ոչ` Իսրայելի, քանի որ արքեպիսկոպոսը բազմիցս հակաիսրայելական արտահայտություններ է արել, իսկ 2013-ի սկզբին խստորեն դատապարտել է Իսրայելին` Հայոց ցեղասպանությունը ճանաչել չցանկանալու կապակցությամբ: