Երուսաղեմի Հայոց պատրիարքի թեկնածուներն առայժմ 4-ն են

Երուսաղեմի հայոց պատրիարքի թեկնածու Տեր Բաբկեն ծայրագույն վարդապետ Անուշյանը լրագրողների հետ հանդիպման ժամանակ կարևորեց  մեր պետության դերը Երուսաղեմի պատրիարքի ընտրության հարցում:

Տեր Բաբկենի  տեղեկություններով` առայժմ  4 թեկնածու կա: Նրա խոսքով` պատրիարք կարող  է նշանակվել 35 տարին լրացած` վարդապետի, արքեպիսկոպոսի և եկեղեցական այլ բարձր կոչում ունեցող հոգևորականը, որն անպայման պետք է լինի Երուսաղեմի միաբանության անդամ:

Պատրիարք ընտրվելու դեպքում Տեր Բաբկենն առաջին հերթին ձեռնամուխ կլինի  Երուսաղեմի պատրիարքարանի շենքի,  դպրոցի և թանգարանի հիմնանորոգմանը, ինչպես նաև  Սրբոց Հակոբյանց տաճարի նորոգմանը: 

Ի դեպ առայժմ հայտնի թեկնածուներից  54-ամյա Տեր Բաբկենն ամենաերիտասարդն է: Նա մասնագիտությամբ իրավաբան է և մյուս թեկնածուների հետ տարաձայնություններ չունի:

Տեր Բաբկենը եղել է Ամերիկայի Արևելյան հայոց թեմի առաջնորդ Տ. Թորգոմ արք. Մանուկյանի խորհրդականը, պաշտոնական գործառույթներում ԱՄՆ Արևելյան թեմի նախորդ և ներկա Առաջնորդների ներկայացուցիչ՝ ԱՄՆ իշխանությունների առջև, ՄԱԿ-ում Ամերիկայի եկեղեցիների ազգայի խորհրդում Երուսաղեմի Հայ պատրիարքարանի իրավական հարցերի խորհրդատու, ԱՄՆ-ի Սբ Թովմաս եկեղեցու հովիվ և այլն:

Երուսաղեմի հայոց պատրիարքին կընտրեն պատրիարքարանում հունվարի 23-25-ը: Պատրիարքի ընտրությունը կատարվում է ժողովի միջոցով, որի ժամանակ գաղտնի քվեարկություն է անցկացվում: