Associated Press-ը մեղադրում է ԱՄՆ արդարադատության նախարարությանը

Ամերիկյան Associated Press տեղեկատվական գործակալությունը մեղադրում է ԱՄՆ արդարադատության նախարարությանն իր լրագրողների հեռախոսները գաղտնալսելու մեջ. տեղեկացնում է ИТАР-ТАСС-ը:

Գործակալության հաղորդագրության մեջ ասվում է, որ նախարարությունը գաղտնի ստացել է գործակալության լրագրողների` անցյալ տարվա ապրիլից մայիս տեղի ունեցած հեռախոսազրույցների ձայնագրությունները: Ենթադրաբար դա արվել է ԿՀՎ-ի` «Ալ Քաիդա»-ի կողմից նախապատրաստվող ահաբեկչությունների հետաքննության շրջանակներում:

Գործակալության տնօրենն ընդգծել է, որ դա ոչ մի բանով չի արդարացվում: «Մենք նախարարության այդ գործողությունը համարում ենք գործակալության` տեղեկատվություն հավաքելու եւ իրադարձությունները լուսաբանելու սահմանադրական իրավունքի լուրջ խախտում»,- հայտարարել է նա:

Իր հերթին, Սպիտակ տունը հերքում է բոլոր մեղադրանքները` հայտարարելով, որ ոչ մի կապ չունի այդ գործի հետ, իսկ գլխավոր դատախազությունը հայտարարել է, որ շատ «զգույշ եւ ուշադիր է» այն հարցերի նկատմամբ, որոնք վերաբերում են մամուլի ազատությանը: