Ինչու ''Ժառանգության'' անդամները տեղամաս չեն ներկայացել

Կենտրոնական ընտրական հանձնաժողովի նախագահ Տիգրան Մուկուչյանն այսօրվա մամուլի ասուլիսում հայտարարեց, որ տեղամասային ընտրական հանձնաժողովներում ընդգրկված 3712 անդամից ընտրական հանձնաժողովներ չեն ներկայացվել 12-ը, որոնցից 8-ը «Ժառանգության» ներկայացուցիչներն են:

«Ժառանգության» մամուլի խոսնակ, Երեւանի ավագանու թեկնածու Հովսեփ Խուրշուդյանը մեզ հետ զրույցում չբացառեց, որ որոշ տեղերում, մասնավորապես՝ Էրեբունի եւ Մալաթիա-Սեբաստիա համայնքներում, ահաբեկումներն այն աստիճանի են հասել, որ հնարավոր է` հանձնաժողովների իրենց անդամները տեղի տան:

Միաժամանակ, Հովսեփ Խուրշուդյանի խոսքերով, իրենք դիմել են ԿԸՀ քարտուղար Արմեն Սմբատյանին՝ տեղեկանալու համար, թե որ տեղամասերի ներկայացուցիչները չեն ներկայացել, սակայն նա հրաժարվել է տեղեկություն տրամադրել:

«Ունեինք ներկայացուցիչ, որ նախապես գիտեինք՝ չէր ներկայանալու, երեկ էր ասել: Սակայն օրենքն արգելում է մեկ օր առաջ փոփոխություն կատարել հանձնաժողովի կազմում: Ունեինք ներկայացուցիչ, որ 5 օր առաջ մեկնել էր Մոսկվա՝ մոռանալով ինքնաբացարկի դիմում գրել: Մենք դիմեցինք ինքնաբացարկի խնդրանքով՝ հենց նույն օրը, սակայն հանձնաժողովը մերժեց խնդրանքը` չնայած դեռ 5 օր կար ընտրություններին»,- պարզաբանեց Խուրշուդյանը: