Գավառի բնակչուհին այսուհետ կապրի Գյումրու ինտերնատում

Հաշմանդամության առաջին կարգ ունեցող Վարսենիկ Թոփլաղալցյանը Գավառ քաղաքում ապրում է միայնակ, անկողնային հիվանդ է: Նա բազմիցս դիմել էր տարբեր պատկան մարմինների իրեն որևէ տուն-ինտերնատում տեղ հատկացնելու համար, սակայն ջանքերն ապարդյուն են եղել, քանի որ կնոջը մերժել են:

Մարդու իրավունքների պաշտպանը Վարսենիկ Թոփլաղալցյանի խնդիրը լուծելու նպատակով գրություն էր ուղարկել աշխատանքի և սոցիալական հարցերի նախարարին` խնդրելով եռօրյա ժամկետում ապահովել Վարսենիկ Թոփլաղալցյանին որևէ տուն-ինտերնատ ուղեգրելը:

Պաշտպանի գրությանն ի պատասխան` աշխատանքի և սոցիալական հարցերի նախարարությունից հայտնել են, որ Գավառի սոցիալական ծառայությունների տարածքային գործակալությունը, հաշվի առնելով քաղաքացու միայնակ և անօգնական լինելու հանգամանքը, աջակցել է նրան տուն-ինտերնատ ընդունվելու համար անհրաժեշտ բոլոր փաստաթղթերի ձեռքբերման հարցում, որոնց հիման վրա նախարարությունը քաղաքացուն ուղեգրել է Գյումրու տուն-ինտերնատ, իսկ Վարսենիկ Թոփլաղալցյանի տեղափոխումը Գավառից Գյումրի կազմակերպել է Գեղարքունիքի մարզպետարանի առողջապահության և սոցիալական պաշպանության վարչությունը:

Վարսենիկ Թոփլաղալցյանի պատշաճ տեղափոխման ողջ ընթացքին հետևել են ՄԻՊ աշխատակազմի Գեղարքունիքի տարածքային գրասենյակի աշխատակիցները: