Դիարբեքիրի փոխքաղաքապետն այցելել է Երեւանի քաղաքապետարան

Երևանի քաղաքապետի տեղակալ Կամո Արեյանը ընդունել է Թուրքիայի Դիարբեքիր քրդաբնակ քաղաքի փոխքաղաքապետ Հեֆիզա Իպեկի գլխավորած պատվիրակությանը. տեղեկացնում է քաղաքապետարանի տեղեկատվության և հասարակայնության հետ կապերի վարչությունը:

Զրույցի ընթացքում Կամո Արեյանը նշել է, որ Երևանում ազգային փոքրամասնությունների, այդ թվում` քրդական համայնքի, համար ստեղծված են բնականոն կենսագործունեության անհրաժեշտ պայմաններ, և նրանք բոլորն էլ պարբերաբար հանդես են գալիս մշակութային և այլ նախաձեռնություններով:

Շնորհակալություն հայտնելով ջերմ ընդունելության համար` Դիարբեքիրի քաղաքապետի տեղակալ Հեֆիզա Իպեկը նշել է, որ Դիարբեքիրում մեծամասնություն կազմող քրդական համայնքը տեղի հայերի հետ մշտապես բարիդրացիական հարաբերություններ է պահպանում՝ ընդգծելով, որ հայերը շատ ակտիվ դերակատարում ունեն Դիարբեքիրի քաղաքական և տնտեսական կյանքում: «Մենք հայերին միշտ էլ վերաբերվել ենք որպես բարեկամ ժողովրդի և վստահ ենք, որ մեր շփումները կարող են լավ հեռանկար ունենալ»,- նշել է Հեֆիզա Իպեկը: