Պակիստանի նախկին նախագահի վրա կոշիկ են նետել

Պակիստանի նախկին նախագահի` գեներալ Փերվեզ Մուշարաֆի վրա կոշիկ են նետել: Դա տեղի է ունեցել, երբ նա դուրս գալիս է եղել Սինդ նահանգի գերագույն դատարանից: Կոշիկը, սակայն, չի դիպել նախագահին: Միջադեպից հետո Մուշարաֆին անվտանգ վայր են տեղափոխել:

Մուշարաֆը 2008-ին նախագահի պաշտոնը լքելուց հետո առաջին անգամ մարտի 24-ին էր ժամանել Կարաչի: «Համապակիստանյան մահմեդական լիգա» կուսակցության ղեկավարը մտադիր է մասնակցել մայիսի 11-ին նշանակված ընդհանուր ընտրություններին:

Պակիստանյան Սինդ նահանգի գերագույն դատարանը Մուշարաֆին հնարավորություն է տվել գրավ մուծել և այդպիսով, Պակիստան վերադառնալու դեպքում, խուսափել ձերբակալությունից: Մուշարաֆը մեղադրվում է 2007 թ. նախկին վարչապետ Բենազիր Բհուտոյի սպանության, ինչպես նաև 2007 թ. երկրում արտակարգ վիճակ հայտարարելու ընթացքում Գերագույն դատարանի դատավորներին ձերբակալելու մեջ: