Ադիբեկյանը գնել է 1000 դրամանոց վերնաշապիկ եւ 4000 դրամանոց կոշիկ

Սեպտեմբերի 1-ին երեխաներին դպրոց ուղարկելու համար անհրաժեշտ է նվազագույնը 50-100 դոլար` կախված ընտանիքների սոցիալական վիճակից. փաստում են սոցիոլոգ Ահարոն Ադիբեկյանի անցկացրած հերթական հարցման արդյունքները:

«Այսօր ծնողը 15.000 դրամ ունենալու դեպքում էլ կարող է երեխային դպրոց ուղարկել»,- տեղեկացրեց Ադիբեկյանը` հավելելով, որ ինքն իր աղջկան դպրոց է ուղարկելու 1000 դրամանոց վերնաշապիկով, 4000 դրամանոց կոշիկով և 3000 դրամանոց շրջազգեստով:

Սոցիոլոգի համոզմամբ` այն ընտանիքները, որոնք պրակտիկ են եւ ունեն առաջին դասարանցի, սկսում են նախապատրաստվել սեպտեմբերի 1-ին 2 տարի առաջ` նախօրոք գնելով համապատասխան պիտույքներ: «Եթե ծնողը շատ վաղուց է նախապատրաստվում դպրոցին, ապա այդ ամենը կատարվում է շատ աննկատ, իսկ եթե թողնում են վերջին օրվան, բնական է, որ բոլորի համար էլ դժվար կլինի»,- ասաց նա` հավելելով, որ պատահում են դեպքեր, երբ երեխան, չունենալով համապատասխան հագուստ կամ պիտույքներ, դպրոց է հաճախում 2 շաբաթ ուշ:

Ադիբեկյանի կարծիքով` պետք է գայթակղիչ որևէ բան գտնել երեխաներին դպրոց առաջնորդելու համար: «Իմ փոքր աղջիկը սկսեց դպրոց գնալ այն պատճառով, որ այնտեղ կարողանում էր ինքնուրույն կերակուր գնել: Այդ փաստը նրան շատ էր դուր գալիս»,- նշեց սոցիոլոգը: