Իրար հասկացանք. բանակցությունների արդյունքը

Արդեն տեղեկացրել ենք, որ «Ժառանգության» համակիրներն այսօր Ազատության հրապարակում փորձել են հացադուլի հայտարարած Րաֆֆի Հովհաննիսյանի համար վրան տեղադրել, սակայն ոստիկանները խոչընդոտել են, իսկ հետո «Ժառանգության» ներկայացուցիչների հետ առանձնացել՝ հարցերը պարզելու:

Բանակցությունների ավարտից հետո Yerkir.am-ը Երեւանի փոխոստիկանապետ Վալերի  Օսիպյանից հետաքրքրվեց` ինչպե՞ս ավարտվեցին բանակցությունները: Ի պատասխան` Օսիպյանը հայտարարեց, որ միայն համապատասխան թույլտվության դեպքում թույլ կտան վրան տեղադրել, իսկ այս պահին նման որոշում չկա: Նա նշեց, որ իրենց որոշումը փոփոխության ենթակա չէ, եւ իրենք առաջնորդվում են օրենքով, իսկ առանց  թույլտվության վրան տեղադրելն օրենքի խախտում է:

«Մենք իրար հասկացանք: Դիմեք «Ժառանգությանը», նրանք կպատասխանեն Ձեր բոլոր հարցերին»,- հայտարարեց Օսիպյանը:
Մեր դիտարկմանն ի պատասխան, որ «Ժառանգությունն» ասում է, թե, անկախ ամեն ինչից, վրանը տեղադրելու են, նա  հորդորեց այլեւս իրեն չխանգարել՝  ծառայության մեջ է: