''Բարեւոլուցիան'' տանելու է սիրով ու բարությամբ

«Մեր պայքարը սիրո պայքար է, եւ այդ սերը ես զգում եմ ամեն վայրկյան մեր հրապարակում: Երախտապարտ եմ ձեր յուրաքանչյուր բարեմաղթանքի, օրհնանքի, մեկ-մեկ քննադատության եւ, ընդհանուր առմամբ, հավատի համար»,- այսօր Ազատության հրապարակում հրավիրած իր ասուլիսը սկսեց Րաֆֆի Հովհաննիսյանը:

Նա նշեց, որ բարեւի հեղափոխությունը` «բարեւոլյուցիան», իրենք տանելու են սիրով, բարությամբ, հավատով եւ անհուն հավատարմությամբ մեր պետության, ժողովրդի ապագայի նկատմամբ: Րաֆֆի Հովհաննիսյանը նշեց նաեւ, որ ով այցելում է Ազատության հրապարակ, իր հետ պետք է ուժ տանի, իսկ թաց աչքերի ժամը Աստված է որոշում:

«Մենք հիմա հաղթական ընթացքի մեջ ենք, եւ ամեն մեկը պայքարի իր համեստ բաժինը պետք է տանի»,- ասաց «Ժառանգության» ղեկավարը:

Րաֆֆի Հովհաննիսյանը շնորհակալություն հայտնեց բոլորին ներկայության, զորակցության եւ այն ոգու համար, որ դրսեւորում են: