ԱԺ-ն շարժումից մի կողմ լինել չի կարող. Արմեն Ռուստամյան

Արդեն տեղեկացրել ենք, որ ԱԺ նախագահ Հովիկ Աբրահամյանի մոտ ԱԺ ՀՅԴ, Ժառանգություն եւ ՀՀԿ խմբակցությունների ղեկավարները խորհրդակցություն են անցկացրել հետընտրական իրավիճակի քննարկելու համար առանձին նիստ հրավիրելու կապակցությամբ:

Խորհրդակցությունից հետո ԱԺ ՀՅԴ խմբակցության ղեկավար Արմեն Ռուստամյանը լրագրողներին հայտնեց, որ դրական է գնահատում ԱԺ նախագահի մոտեցումը, եւ նշեց, որ ընդդիմությունն առաջարկել է արտահերթ նիստ հրավիրել, եւ որ ԱԺ-ն իր հստակ դերակատարումը ունենա ստեղծված խնդիրների լուծման գործում:

«Պարզ է, որ երկրում առկա է շատ լուրջ դժգոհություն, եւ եթե այդ դժգոհության լուծումները համատեղ չգտնենք, ստացվում է, որ մենք մեր դերի մեջ չենք: ԱԺ-ն դրսում ընթացքող շարժումից մի կողմ լինել չի կարող»,- հայտարարեց Ռուստամյանը:

Նա նշեց, որ հնարավոր արտահերթ նիստում ինչ-որ որոշում կլինի, եւ այն կարող է լինել հայտարարության տեսքով,  կարող է նախանշել այն քայլերի հաջորդականությունը, երբ կհաջողվի համատեղ ուժերով երկիրը դուրս բերել այս վիճակից: ՀՅԴ-ական պատգամավորն ասաց, որ բոլորը, այդ թվում` նաեւ մեծամասնությունը, ընդունում են, որ երկրում դժգոհություն կա, դա փաստ է, եւ եթե ընդունում են, ապա չանել որեւէ քայլ, որ այդ դժգոհությունը գոնե պակասի, նշանակում է ջայլամի քաղաքականությամբ զբաղվել եւ կուտակել խնդիրներ, որոնք հետագայում կհանգեցնեն ավելի մեծ պայթյունների: