Եթե կառույցը 19-րդ դարի չէ, ուրեմն կարելի է քանդե՞լ

Այսօր Աբովյան 3 հասցեում գտնվող ԱՕԿՍ-ի շենքի առջեւ բնապահպանները բողոքի ցույց էին կազմակերպել:

Ըստ նրանց` շենքի հետնամասում «Լոկալ Դիվելոփերզ» ընկերության (նախագահ` Սամվել Մայրապետյան) կողմից կառուցվող հյուրանոցը սպառնում է ԱՕԿՍ-ի եւ կողքի շինության գոյությանը: Ցուցարարները պնդում են, որ շինարարության հետեւանքով արդեն երկու կառույց է քանդվել:

ՀՀ մշակույթի նախարարության Հուշարձանների պահպանության գործակալության Երեւանի տարածքային պետ Կարո Այվազյանը հավաստիացնում է, թե քանդված շինությունը 19-րդ դարի կառույց չէ, այլ 1970-ականներին է կառուցվել եւ հուշարձան չի համարվում: Այվազյանը պնդում է, որ կառույցը 2004-ին արդեն իսկ գոյություն չի ունեցել, ինչի հետ ցուցարարները համաձայն չեն. նրանք էլ, իրենց հերթին, հավաստիացնում են, որ այն քանդվել է 7 ամիս առաջ:

«Բոլորը համարակալված կառույցներ են եւ անպայմանորեն վերակառուցվելու են «Հին Երեւան» նախագծի շրջանակում»,- ասաց Այվազյանը` հավելելով, որ, այնուամենայնիվ, բնապահպանների բարձրացրած հարցին ընթացք կտա: