Վեպս այն մասին է, որ ադրբեջանցիներն ու հայերը կարող են ապրել միասին. Աքրամ Այլիսլի

Ադրբեջանից գրող Աքրամ Այլիսլին, որին նախագահ Իլհամ Ալիեւի հրամանով զրկել են ժողովրդական գրողի կոչումից «Քարե երազներ» ստեղծագրծության համար, Голос России-ին տված հարցազրույցում պարզաբանել է, թե ինչի վրա են հիմնված իշխանությունների գործողությունները:

«Ես բազմիցս ասել եմ, որ այդ վեպն այն մասին է, որ երկու ժողովուրդներ` ադրբեջանցիներն ու հայերը, կարող են ապրել միասին: Նրանք այդ հնարավորությունն ունեն: Իմ գլխավոր նպատակն էր պատմել այդ մասին:

Հինգաշաբթի օրը իմացա, որ ինձ զրկել են կոչումներից, շքանշաններից եւ այլնից: Դա շատ ճնշող է, ես դա չէի սպասում: Այդ վեպը հարկավոր է կարդալ: Այդ ժամանակ ամեն ոք կհասկանա, որ ինձ պատժելու պատճառ չկա, որ ես ցավում եմ իմ ժողովրդի համար: Ասում են` իբր  նրան ներկայացրել եմ ագրեսիվ, ոչ խաղաղասեր: Բայց դա բացարձակ անհեթեթություն է, ամեն ինչ հակառակն է: Ադրբեջանցիները խաղաղություն ուզում են: Վեպս սկսվում է այն բանից, որ ադրբեջանցին փրկում է հային, որին ցանկանում են սպանել: Ինչո՞ւ պետք է այս վեպը անարգի կամ ստորացնի ադրբեջանցի ժողովրդին»,- ասել է գրողը:

Ըստ նրա` սովորական քաղաքացիները համոզված են, որ կարելի է խաղաղ ապրել հայերի հետ, մինչդեռ իշխանությունները ատելություն են քարոզում, իսկ վեպը դեմ է պաշտոնական քաղաքականությանը: Իր նկատմամբ սկսված հալածանքները Այլիսլին համեմատում է ստալինյան ժամանակների հետ: