Անհնար է, որ ընտրություններից հետո կադրային փոփոխություններ չլինեն. Գալուստ Սահակյան

Նախագահական ընտրություններից հետո կադրային փոփոխություններն ինքնանպատակ չեն: Այս մասին Yerkir.am-ի հետ զրույցում հայտարարեց ՀՀԿ փոխնախագահ Գալուստ Սահակյանը եւ ընդգծեց, որ ամեն ինչ կախված է նրանից, թե ընտրություններից հետո ինչպիսի ընտրական արժեհամակարգ կստեղծվի, ինչպես կգնահատվեն ընտրությունները, ինչ նոր խնդիրներ կառաջանան, եւ ըստ այդմ էլ` կորոշվեն դերակատարները:

Դիտարկմանը, որ, ըստ էության, ամեն ինչ, կարծես, նորմալ է անցնելու, Սահակյանն արձագանքեց. «Իհարկե, եթե նորմալ անցնեն, եւ գնահատականներն այնպիսին լինեն, որը համարժեք է մեր տրամաբանությանը, բնականաբար, եւ այս դեպքում նոր մոտեցումներ կառաջանան, եւ այն դեպքում, եթե ինչ-որ արկածախնդիր գործընթացներ սկսվեն: Այսինքն` մինչեւ քաղաքական պայմանը չլինի, թե ինչպիսին է ընտրություններից հետո իրավիճակը, դերակատարներին շատ դժվար է որոշել, մանավանդ` մեզ համար, որովհետեւ ցանկացած դերակատարման համար շատ թեկնածուներ ունենք»:

Դիտարկմանը, թե, օրինակ, վարչապետի համա՞ր էլ շատ թեկնածուներ ունեն, նա կարճ պատասխանեց` դե, իհարկե:

«Երբ ասում եմ դերակատարների խնդիր, ամենեւին կարող է նշանակություն չունենալ, թե, օրինակ, տվյալ նախարարը կամ չինովնիկն ինչպես է աշխատել, կարեւորը քաղաքական պայմանն է, թե ինչ բարեփոխումների, ծրագրերի համար է պետք այդ դերակատարը: Անհնար է, որ նախագահական ընտրություններից հետո կադրային փոփոխություններ չլինեն: Դա ոչ միայն իշխանավորներից է կախված, այլեւ կյանքը թելադրում է նաեւ իրենը: Նախագահական ընտրություններից շարունակվելու է այն դրականը, որ եղել է»,- նշեց Սահակյանը: