Եկավ, ''սապոնվեց'', գնաց

Այսօր լրագրողների հետ հանդիպման ժամանակ ՀԽՍՀ Գերագույն խորհրդի պատգամավոր, Լեւոն Տեր-Պետրոսյանի նախկին թիմակից Ազատ Արշակյանը գործող նախագահ Սերժ Սարգսյանին գովերգող այնպիսի հայտարարություններ արեց, որ կդժվարանային անել անգամ ամենակարկառուն ՀՀԿ-ականները:

Նախկին պատգամավորը նախ նշեց, որ մյուս ուժերը հետ քաշվեցին` այդ կերպ Սերժ Սարգսյանին մեծ շանս տալով, որ ԲՀԿ-ն, ՀՅԴ-ն եւ ՀԱԿ-ը չգտան Սերժ Սարգսյանի առաջարկած ծրագրին այլընտրանքային ծրագիր: «Սերժ Սարգսյանը բարձրացրել է պետականության դրոշը, իսկ որեւէ մեկըն այդ ուժերից` ԲՀԿ-ն կամ ՀՅԴ-ն, չէին կարող կանգնել պետականությանը դեմ»,- հայտարարեց նախկին պատգամավորը:

Նա նաեւ կարծիք հայտնեց, որ նախագահ Սերժ Սարգսյանին այլընտրանք չկա: Հարցին, թե` ինչո՞ւ, պատասխանեց. «Քանի դեռ Հայաստանում թոշակային տարիքի չեն հասել բոլոր նրանք, ովքեր մասնակցել են Ղարաբաղի ազատագրմանը, նրանք պետք է լինեն առաջին դեմքը, այդ թեկնածուների մեջ ամենահարմարը Սերժ Սարգսյանն է: Սերժ Սարգսյանն ունի ադմինիստրատիվ աշխատանքային մեծ փորձ»: Արշակյանը թեեւ չի ցանկանում, որ նախագահը փոխվի, բայց վստահ է, որ Սերժ Սարգսյանը պետք է ազատվի իր թիմից եւ նորը ձեւավորի:

Լրագրողների դիտարկմանը, թե ինչով կբացատրի մեծ չափերի հասնող արտագաղթը, երբ ասում է, որ Սերժ Սարգսյանը բարձրացրել է պետականության դրոշը, նախկին պատգամավորը սենսացիոն պատասխանտվեց. «Ով ասեց, որ Հայաստանում մարդիկ պետք է ճորտացված լինեն եւ տեղաշարժվելու իրավունք չունենան, գնում են, թող գնան ու վերադառնան: Բացի այդ` արտագաղթը անհրաժեշտ բան է նույնիսկ»:

Ազատ Արշակյանը հայտարարեց նաեւ, որ Սերժ Սարգսյանն ու «Ժառանգություն»-ը գործում են նույն դաշտում, քանի որ ԱԺ-ում «Ժառանգությունը» խմբակցություն ունի: