ՊՆ զորամասում կին խոհարարները ծեծել են միմյանց

Այսօր մեր դատական ատյաններում քննվում են ՊՆ զորամասերում տեղի ունեցած բազմաթիվ միջադեպեր, որոնցից շատերը որակվում են հասարակական կարգի և բարոյականության դեմ ուղղված հանցագործություններ ու պատժվում են  ՀՀ քր.օր-ի 258-րդ հոդվածով:  ՊՆ զորամասերից մեկում (անունը չենք հրապարակում` նյութում առկա փաստական որոշ հանգամանքներից ելնելով, որոնք հնարավոր է բացասաբար անդրադառնան տվյալ զորամասի հեղինակության վրա) տեղի ունեցած` նախադեպը չունեցող մի դեպք էլ քննվում է ՀՀ դատարաններից մեկում:

Ամիսներ առաջ ՊՆ զորամասում 2 կին խոհարարներ ճաշարանի հանգստի համար նախատեսված սենյակում վիճաբանություն են ունենում, միմյանց սեռական բնույթի հայհոյանքներ տալիս, հրմշտում, այնուհետեւ վեճը վերածվում է ծեծկռտուքի, որը տևում է 5 րոպե: Խոհարարների վեճը ծագել էր միմյանց հասցեին չարախոսելու պատճառով, դրան գումարվել էր հերթափոխի հետ կապված տարաձայնությունը: Նրանց չեն կարողացել բաժանել անգամ զինծառայողները: 

Աստղիկ Ա.-ին և Նունե Ս.-ին առաջադրված է պայմանագրային զինծառայության ընթացքում, ՀՀ զինված ուժերի ներքին ծառայության կանոնագրքի կանոնները խախտելով, միմյանց հայհոյելու և ծեծելու մեղադրանք: Հատկանշական է, որ նախաքննության ընթացքում մեղադրյալներն իրենց մեղավոր են ճանաչել և ամենայն մանրամասնությամբ նկարագրել դեպքրը, սակայն դատաքննության ընթացքում, թեև խոստովանական ցուցմունքներով հաստատել են առաջադրված մեղադրանքները, սակայն իրենց մեղավոր չեն ճանաչել:

Այդ հանգամանքը տարօրինակ էր մեղադրող կողմի համար, ով դատական հերթական նիստից առաջ հորդորեց ամբաստանյալներին ընդունել իրենց մեղքը, քանի որ, «ի վերջո, աղջիկ են, ամոթ է»: Այնուամենայնիվ, դատախազը նրանց նկատմամբ մեծահոգի գտնվեց և պատիժը ծանրացնող որևէ հանգամանքներ չնշեց, ընդհակառակը` մի քանի մեղմացնող հանգամանքներ թվեց: Օրինակ` թե' Աստղիկը, թե' Նունեն զորամասի հրամանատարության կողմից դրական անձնավորություններ են որակված, նախկինում դատապարտված չեն եղել, ավելին` Աստղիկը զոհված ազատամարտիկի այրի է, իսկ Նունեն ունի զինվորական պարգեւներ և իր խնամակալության տակ` հաշմանդամ մայր:

Մեղադրող դատախազը միջնորդեց ՀՀ քր.օր-ի 258-րդ հոդվածի առաջին մասով նրանց  դատապարտել կալանքի` 20 օր ժամկետով, որը պետք է առանձին-առանձին կրեն կայազորային կարգապահական գումարտակում: 

Հետաքրքրական է նաև այն, որ պաշտպանական կողմերը չէին պատրաստել իրենց պաշտպանական ճառերը, քանի որ, ինչպես իրենք են բնորոշում, չգիտեն` ինչ ասեն: Դատարանը նրանց ժամանակ տվեց, որպեսզի պատրաստեն իրենց ճառերը և ներկայացնեն հաջորդ դատական նիստին: Պաշտպանական կողմն ասում է, որ իրենք միասնության կողմնակից են և ցանկանում են, որ կանայք հաշտվեն: Այլ բան էին վկայում կանանց` միմյանց ուղղված  թարս-թարս հայացքները:

Թագուհի ՄԵԼՔՈՆՅԱՆ