Երեւանը չի դիմանա 7-9 բալ երկրաշարժի

Երեւանն ի վիճակի չի լինի դիմակայել 7-9 բալ երկրաշարժի. այսօր լրագրողներին հայտնել է ճապոնացի մասնագետ Ֆումիո Կանեկոն: Նրա խոսքերով` հիմնականում կփլուզվեն մայրաքաղաքի` խորհրդային շրջանում կառուցված բարձրահարկ շենքերը:

«Այսօր Երեւանում կա խորհրդային շրջանի 5000 բարձրահարկ: 7-9 բալ երկրաշարժի դեպքում դրանցից 900-ը հիմնահատակ կփլուզվեն, մնացածը` մասամբ: Այսինքն` մայրաքաղաքի միլիոնանոց բնակչության զգալի մասը` մոտ 30 հազար բնակիչ, երկրաշարժի զոհ կդառնա: Երկու անգամ ավելի կլինի վիրավորների թիվը»,- ասել է նա:

Միջազգային համագործակցության Ճապոնական գործակալության մասնագետները մեկ տարի հետազոտություններ են իրականացրել Երեւանում եւ այսօր ներկայացրել են իրենց միջանկյալ զեկույցը:

«Հարկավոր է ստեղծել բոլոր աշխատանքները կառավարող ուժեղ համակարգ: Դա պետք է անեն արտակարգ իրավիճակների նախարարությունը, փրկարար ծառայությունը եւ Երեւանի քաղաքապետարանը: Հարկավոր է ամրացնել կամ քանդել վթարային շենքերը, նաեւ տեղեկացնել հասարկությանը»,- խորհուրդ է տվել ճապոնացի մասնագետը: