Վերադարձ ի շրջանս յուր

ՀԱԿ-ի երեկվա հանրահավաքի վերաբերյալ «Երկիր»-ի թղթակցի մի քանի հարցերին պատասխանում է ներկայումս «Ազատ դեմոկրատներ», նախկինում ՀԱԿ անդամ Ալեքսանդր Արզումանյանը:

- Պարո'ն Արզումանյան, ըստ էության, ՀԱԿ-ի երեկվա հանրահավաքի ժամանակ հայտարարվեց, որ իրենք նախագահի հրաժարականին պատրաստվում են հասնել ապագա խորհրդարանում մեծ թվով ձայներ ունենալու միջոցով...

- Դեռ 1.5 տարի առաջ ես ասել եմ, որ գործընթացը տանում է դեպի հերթական խորհրդարանական ընտրություններ, այսինքն` վերադարձ ի շրջանս յուր: Ի վերջո, երեկ հստակ ասվեց, որ, այո, իշխանափոխության պահանջը դրվում է մի կողմ եւ խոսքն այսուհետ գնում է հերթական խորհրդարանական ընտրությունների մասին, հենց դրա պատճառով էր, որ ես դուրս եկա ՀԱԿ-ից:

- Այսինքն` երեկ մեկնարկն էր...

- Երեկ, ի վերջո, համարձակություն ունեցան հասարակությանն ասել, որ այս ամբողջ ընթացքը, ընդդիմադիր դաշտին քարկոծելը միտված էր միայն մի բանի, մեկ նպատակ էր հետապնդում` սկսել նախընտրական քարոզարշավը: Այո, երեկ տրվեց ՀԱԿ-ի նախընտրական քարոզարշավի մեկնարկը:

- Իսկ ՀԱԿ-ին, իրո՞ք, կհաջողվի մտնել խորհրդարան:

- Չեմ կարող ասել, դա Ահարոն Ադիբեկյանին պետք է հարցնել: Ես կանխատեսումներ չեմ անում, կարող եմ խոսել միայն մեր կուսակցության անունից: Ի վերջո, ամեն մեկը պայքարելու է իր ձայների համար:

- Այդուհանդերձ, ՀԱԿ-ին կհաջողվի՞ հասնել բաղձալի ցանկությանը:

- Անկեղծ ասած` դա ինձ քիչ է հետաքրքրում:

- Իսկ «Ազատ դեմոկրատների՞ն»:

- Անկասկած:

- Ի՞նչն է Ձեզ նման լավատեսության հիմքեր տալիս:

- Որովհետեւ մենք անկեղծ ենք հասարակության հետ: