Ռուսաստանը դարձյալ առաջարկում է Սիրիայի հարցով իր բանաձեւը

Մոսկվան համարում է, որ ՄԱԿ-ի Անվտանգության խորհուրդը կարող է իր «կառուցողական խոսքն» ասել Սիրիայում ստեղծված իրադրության կապակցությամբ այնպես, ինչպես արեց Եմենի դեպքում. ԱԽ բաց նիստի ժամանակ ելույթ ունենալով` հայտարարել է ՄԱԿ-ում ՌԴ մշտական ներկայացուցիչ Վիտալի Չուրկինը:

Դեսպանը իր արեւմտյան գործընկերներին հիշեցրել է, որ Սիրիայի հարցով ռուս-չինական բանաձեւի նախագիծը, «կողմնորոշված կարգավորման, այլ ոչ թե հակամարտության սրման ուղղությամբ», ԱԽ անդամների տրամադրության տակ է:

«Ակնհայտ է, որ Սիրիայի նկատմամբ միջազգային հանրության որոշ անդամների ռազմավարությունը` սպառնալիքների, ճնշումների, երկրում իրադրությունը սրող պատժամիջոցների ռազմավարությունը, արդյունք չտվեց»,- հայտարարել է Չուրկինը:

Հիշեցնենք, որ երկու շաբաթ առաջ Ռուսաստանը եւ Չինաստանը վետո էին դրել ԱԽ` Սիրիայի հարցով արեւմտյան բանաձեւի նախագծի վրա: