Շրջվարչակազմի ղեկավար՝ դարձյալ ուժային կառույցից

Արդեն տեղեկացրել ենք, որ մի քանի օր առաջ ԼՂՀ կառավարության որոշմամբ իրենց զբաղեցրած պաշտոններից ազատվել են հանրապետության Մարտակերտի եւ Մարտունու շրջանների շրջվարչակազմի ղեկավարները, ովքեր, ըստ yerkir.am-ի տեղեկությունների, թերացել են վարկերի վերադարձման գործում:

ԼՂՀ կառավարության տեղեկատվության եւ հասարակայնության հետ կապերի վարչությունից հայտնում են, որ կառավարության` այսօր ընդունած որոշմամբ` Լեւոն Չալյանը նշանակվել է Մարտակերտի շրջանի վարչակազմի ղեկավար: Լեւոն Չալյանը թոշակի անցնելուց առաջ զբաղեցնում էր ոստիկանության անձնագրային ծառայության պետի պաշտոնը եւ ունի ոստիկանության գնդապետի կոչում:

Չալյանը իրավապահ մարմիններում երկար տարիներ աշխատած  վարչակազմի միակ ղեկավարը չէ: ԼՂՀ 7 շրջաններից արդեն 4-ում վարչակազմի ղեկավարներն իրավապահ մարմինների նախկին աշխատողներ են: 

Մարտունու շրջանային վարչակազմի ղեկավար առայժմ չեն նշանակել, բայց արդեն լուրեր են պտտվում, որ նորանշանակ ղեկավարը դարձյալ կլինի ուժային կառույցներից: