Հռոմի պապը հանդիպել է սեռական բռնությունների զոհերի հետ

Հռոմի պապ Բենեդիկտոս 16-րդը ուրբաթ օրը Գերմանիայում հանդիպել է մի խումբ մարդկանց հետ, ովքեր սեռական բռնությունների են ենթարկվել կաթոլիկ եկեղեցու հոգեւորականների կողմից:

CNN-ը հաղորդում է, որ, բացի զոհերի հետ զրույցից, Հռոմի պապը հանդիպում է ունեցել նաեւ նրանց խնամակալների հետ:

«Ցնցված եմ եւ խորապես ցավում եմ այս մարդկանց տանջանքների համար»,- ասել է աշխարհի կաթոլիկների առաջնորդը` հավաստիացնելով, որ բոլոր միջոցները ձեռնարկվելու են նման դեպքերից խուսափելու եւ երեխաներին պաշտպանելու համար:

Սկանդալի հետ կապված` Հռոմի պապը բազում հանդիպումներ է ունեցել աշխարհի կաթոլիկ տարբեր երկրներում, սակայն այս հանդիպումը յուրօրինակ էր նրանով, որ այն տեղի է ունենում նրա հայրենիքում, եւ հենց ինքն էլ տարիներ առաջ մեծ սկանդալային պատմության կենտրոնում էր հայտնվել, երբ թույլատրել էին Գերմանիայից տեղափոխել մի մարդու, ով մեղադրվում էր երեխաների շահագործելու մեջ: Ըստ «Շպիգելի»` այդ սկանդալից հետո 181 հազար կաթոլիկ թողեց եկեղեցին:

Այցի ժամանակ Հռոմի պապը հանդիպումներ է ունեցել նաեւ տեղի մուսուլմանական համայնքի հետ, ելույթ է ունեցել կառավարությունում, խորհրդարանում: