Ագրեսորն իրեն ավելի զսպված կզգա

Ոչնչացված անօդաչու ինքնաթիռը շատ կարեւոր փաստարկ եւ նյութական ապացույց է, որ Ադրբեջանը խախտում է զինադադարը. «Ազատություն» ռադիոկայանի հետ զրույցում ասել է ԼՂՀ նախագահի մամուլի քարտուղար Դավիթ Բաբայանը:

«Որովհետեւ այդ ինքնաթիռի մնացորդները գտնվում են ԼՂՀ տարածքում, որոնք, իրոք, փաստում են, որ Ադրբեջանը կիրառում է այդ ինքնաթիռները եւ պարբերաբար խախտում է ԼՂՀ օդային սահմանը»,- ընդգծել է նա:

Ըստ Դ. Բաբայանի` դա քաղաքական տեսանկյունից երկու կարեւոր հետեւանքներ կունենա, նախ` ագրեսորն իրեն ավելի զսպված կզգա, որովհետեւ նման ռազմական տեխնիկայի ոչնչացումը ցույց է տալիս նաեւ մեր բանակի տեխնիկական հագեցվածության աստիճանը, երկրորդ` ԵԱՀԿ դիտորդական առաքելությունը երեւի ավելի կխստացվի, կընդլայնվի:

«Ինձ թվում է, որ միջազգային հանրությունը պետք է կտրուկ վերանայի իր քաղաքականությունը եւ ավելի գործնական քայլեր ձեռնարկի Ադրբեջանի նկատմամբ»,- նշել է ԼՂՀ նախագահի խոսնակը: