Անհապաղ շտկել թերությունները

ՀՀ առողջապահության նախարար Հարություն Քուշկյանն աշխատանքային այցով եղել է Արագածոտնի և Շիրակի մարզերում:

Նա նախ Ապարանի բժշկական կենտրոն է այցելել, ծանոթացել ՀՀ «Առողջապահական համակարգի արդիականացում» վարկային ծրագրի շրջանակներում իրականացվող շինարարական աշխատանքների ընթացքին, գնահատել կատարված աշխատանքների որակը, մի շարք հանձնարարականներ տվել:

Նախարարն աշխատանքային հանդիպման ժամանակ հստակեցրել է Ապարանի բժշկական կենտրոնի շահագործման հանձնելու ժամկետները:

Այնուհետև նախարարն այցելել է Գյումրիում նոր կառուցվող բժշկական կենտրոն` շինարարական աշխատանքների ընթացքին ծանոթանալու: Նախարարի կողմից մատնանշվել են որոշ թերություններ, մասնավորապես` կապալառու կազմակերպության կողմից շինարարական աշխատանքների ավարտի ժամկետների որոշակի ուշացում, շինարարական աշխատանքների որակին առնչվող որոշ թերացումներ:

Վերոնշյալի առնչությամբ նախարարը պահանջել է սեղմ ժամկետում ներկայացնել շինարարական աշխատանքների նոր և հստակ ժամանակացույց և հանձնարարել անհապաղ շտկել առկա թերությունները, ինչպես նաև պահպանել շինարարական աշխատանքների բարձր որակը:

ՀՀ առողջապահության նախարարի Շիրակի մարզ այցելության հաջորդ վայրը Ամասիայի առողջության կենտրոնն էր, որը հիմնանորոգվում է Հայաստանի սոցիալական ներդրումների հիմնադրամի միջոցներով: Այցի ընթացքում Հարություն Քուշկյանը ծանոթացել է շինարարական աշխատանքների ընթացքին, կատարված և նախատեսվող աշխատանքներին: