Բռնաբարության գործով որպես վկա են ներգրավված քաղաքապետի եւ ոստիկանի որդիները

Ոստիկանության քննչական գլխավոր վարչության Տավուշի մարզի քննչական բաժնի Նոյեմբերյանի քննչական բաժանմունքում հարուցվել է քրեական գործ ՀՀ  ՔՕ 138 հոդվածի 2-րդ մասի 1-ին եւ 3-րդ կետերով (բռնաբարությունը, որը կատարվել է մի խումբ անձանց կողմից անչափահասի նկատմամբ):

Ինչպես Նոյեմբերյանից հայտնում է ֆոտոլրագրող Գագիկ Շամշյանը, նշված քրեական գործը հարուցվել է Տավուշի մարզի Կողբ գյուղի միջնակարգ դպրոցի աշակերտուհի 17-ամյա Լ. Ն-ի հայտարարության հիման վրա: Սեպտեմբերի 2-ին Լ. Ն.-ն ոստիկանության Նոյեմբերյանի բաժին հայտարարություն է տվել, որ սեպտեմբերի 1-ին` ժամը 18-ի սահմաններում, Նոյեմբերյանի թիվ 2-րդ միջնակարգ դպրոցի աշակերտներ 17-ամյա Սամվել Անանյանը, 16-ամյա Նարեկ Հակոբյանը եւ  Սերգեյ Ամիրաղյանը BMW մակնիշի ավտոմեքենայով իրեն տարել են Նոյեմբերյան քաղաքի մոռակայքում գտնվող «30 թվական» աղբյուր-հուշարձանի մոտ գտնվող հանդամաս եւ բռնաբարել:

Նոյեմբերյանցիները ֆոտոլրագրողին պատմել են, որ Սերգեյ Ամիրաղյանի հայրը Նոյեմբերյանի քաղաքապետ Վանուշ Ամիրաղյանն է, իսկ Նարեկ Հակոբյանի հայրը աշխատում է ոստիկանության Նոյեմբերյանի բաժնում` պրոֆիլակտիկայի ավագ տեսուչ, կոչումով` մայոր:

Ֆոտոլրագրող Գագիկ Շամշյանը հայտնում է նաեւ, որ Լ. Ն.-ի մայրը սեպտեմբերի 1-ին հայտարարություն է տվել ոստիկանության Նոյեմբերյանի բաժին եւ հայտնել, որ իր աղջիկը տանից դուրս է եկել եւ չի վերադարձել: Մեկ օր անց ոստիկանության Տավուշի մարզի վարչության աշխատակիցները Նոյեմբերյանի ոստիկանների հետ հայտնաբերում են աղջկան եւ նրան հանձնում ծնողին: Հաջորդ օրը աղջիկն արդեն հայտարարություն է տալիս բռնաբարության փաստի մասին:

Այս պահին 3 անչափահաս տղաները նշված քրեական գործում անցնում են որպես վկա: Քննիչի որոշմամբ` աղջկա նկատմամբ նշանակվել է դատաբժշկական փորձաքննություն: