Անօրինական գործողություն էր՝ ինձ բերման են ենթարկել որպես կասկածյալ, հարցաքննել որպես վկա. ԵՊՀ ուսխորհրդի նախագահ

ԵՊՀ ՈՒԽ նախագահ Դավիթ Ափոյանը ազատ է արձակվել ոստիկանության բաժանմունքից՝ տեղեկացնում է Yerkir.am-ը։

Վիճարկելու ենք ինձ բերման ենթարկելու օրինականությունը` ասաց ԵՊՀ ուսխորհրդի նախագահը:

Նրան բերման ենթարկելու հիմք է հանդիսացել այն, որ համալսարանի դիմաց տեղի ունեցած վիճաբանությանը մասնակցել է նաև ԵՊՀ ՈՒԽ անդամներից մեկը: Ափոյանը փաստում է՝ այդ անձին չի ճանաչում։

«Ես նրանց ասացի, որ չեմ ճանաչում տվյալ անձին: Որոշ ժամանակ անց իրավապահներից մեկը դուրս եկավ, ենթադրում եմ, հեռախոսով խոսեց, հետ եկավ և ասաց, որ պետք է ինձ բերման ենթարկեն։ Դա տարօրինակ էր: Ես նրանց հարցրի, թե ինչ հիմքով են ինձ բերման ենթարկում, ծանուցման կամ որոշման օրինակ ուզեցի, որևէ բան ցույց չտվեցին»,- նշեց նա։

Դավիթ Ափոյանին Ոստիկանության բաժանմունք են տարել որպես կասկածյալ,  բայց հարցաքննվել է որպես վկա։

«Ես ուսանողական խորհրդի պարգևատրման ժամանակ բեմում կանգնած եմ եղել, 200 ուսանողի ներկայությամբ ինձ, որպես վկա, կանչում են հարցաքննության․ սա ծիծաղելի է։ Նրանք անհիմն են ինձ բերման ենթարկել»,- ասաց նա։

Ավելի վաղ Yerkir.am-ը տեղեկացրել էր, որ ԵՊՀ ուսանողական խորհրդի նախագահ Դավիթ Ափոյանը բերման է ենթարկվել խուլիգանության դեպքի առթիվ հարուցված քրեական գործի շրջանակներում, որը քննվում է ՀՀ ՔԿ Կենտրոն և Նորք-Մարաշ վարչական շրջանների քննչական բաժնում։