Ազատության դիմաց` Լիբիայի ոսկին

Մուամար Կադաֆին կփորձի վաճառել Լիբիայի ոսկու պաշարի մի մասը, որպեսզի վճարի իր անվտանգության համար եւ քաոս սերմանի հյուսիսաֆրիկյան երկրների ցեղախմբերում. հայտարարել է Լիբիայի Կենտրոնական բանկի նախկին կառավարիչ Ֆարհատ Բենգդարան, որը ներկայումս համակրում է ապստամբներին:

Իտալական Corriere della Sera թերթին նա հայտնել է, որ բոլորովին վերջերս Կադաֆիի շրջապատից մեկն իր ընկերոջը 25 տոննա ոսկի է առաջարկել: «Ընկերս անմիջապես կապ հաստատեց ինձ հետ, եւ ես նրան խորհուրդ տվեցի հրաժարվել, ինչն էլ նա արեց: Սակայն նման գործարք իրականացնելու փորձի փաստը Կադաֆիի մտադրությունների վառ ապացույցն է»,- ասել է Բենգդարան: Առանց այլ մանրամասներ նշելու նա միայն հավելել է, որ իր ընկերը լիբիացի չէ:

Տրիպոլիում գտնվող ոսկու պաշարը գնահատվում է 10 մլրդ դոլար: Բենգդարայի կարծքիով` Կադաֆին կարող էր իր հետ տանել դրա մի մասը: