Սիրիայի իշխանությունները դադարեցնում են ռազմական եւ ոստիկանական գործողությունները

Սիրիայի իշխանությունները դադարեցնում են բոլոր ռազմական եւ ոստիկանական գործողությունները ընդդիմության կողմնակիցների դեմ: Այդ մասին, ըստ «Ազատություն» ռադիոկայանի ռուսաստանյան ծառայության, ՄԱԿ-ի գլխավոր քարտուղար Պան Գի Մունի հետ հեռախոսազրույցում ասել է Սիրիայի նախագահ Բաշար Ասադը:

ՄԱԿ-ի գլխավոր քարտուղարը լուրջ անհանգստություն է հայտնել Լաթակիա եւ այլ քաղաքներում կառավարական զորքերի իրականացրած վերջին գործողությունների կապակցությամբ:

Այսօր ՄԱԿ-ի մարդու իրավունքների հարցերով գերատեսչության ղեկավար Նավի Պիլեյը Անվտանգության խորհրդի փակ խորհրդակցությունների ժամանակ հանդես է գալու Սիրիայում տիրող իրադրության վերաբերյալ զեկույցով: Որոշ տեղեկությունների համաձայն ` նա պահանջելու է, որ Սիրիայում մարդու իրավունքների խախտումների դեպքերը հետաքննի Միջազգային քրեական դատարանը: