Հայ ուսանող-մարզիկն առաջին անգամ արժանացել է ոսկե մեդալի

Հայ ուսանող-ծանրամարտիկ Աղասի Աղասյանը /77 կգ քաշային կարգ/ Չինաստանի Չենժեն քաղաքում մեկնարկած ուսանողական մարզական համաշխարհային 26-րդ ունիվերսիադայում, երկամարտում ցուցաբերելով 337 կգ ընդհանուր արդյունք, գրավել է առաջին տեղը` արժանանալով ոսկե մեդալի. տեղեկացնում է ՀՀ ԿԳ նախարարությունը:

ՀՀ կրթության և գիտության նախարար, ՀՀ ուսանողական մարզական ֆեդերացիայի նախագահ Արմեն Աշոտյանը շնորհավորել է հայ մարզիկներին առաջին մեծ հաղթանակի կապակցությամբ:

ՀՀ ուսանող-մարզիկները համաշխարհային ունիվերսիադային մասնակցում են 10-րդ անգամ: Ուսանողական խաղերում մեր ներկայացուցիչները նվաճել են 14 մեդալ, այդ թվում` 3-ը` արծաթ, 11-ը` բրոնզ:

Անկախ Հայաստանի պատմության մեջ առաջին անգամ է, որ հայ ուսանող-մարզիկը համաշխարհային ունիվերսիադայում արժանանում է ոսկե մեդալի:

Համաշխարհային 26-րդ ունիվերսիադայում հայ ուսանող-մարզիկները հանդես են գալիս 5 մարզաձևերում` շախմատ, ծանրամարտ, թեքվանդո, ձյուդո, թենիս: