ՀԱՅԿԱԿԱՆ ԺԱՄԱՆԱԿ. Հիմա ո՞վ է հրեշը

Ախթալայի եւ շրջակա գյուղերի շուրջ 2500 բնակիչներ ստորագրել են «Ախթալայի ԼՀԿ» սեփականատեր, մանկապղծության մեջ մեղադրվող Սերոբ Տեր-Պողոսյանի դրական բնութագրի տակ, որ դատարանը նրա նկատմամբ մեղմ վարվի:

Ստորագրությունները կցված են քրգործին եւ կազմում են 1,5 հատոր:  Ախթալան պաշտոնապես ունի 2400 բնակիչ:

Տեր-Պողոսյանի փաստաբան Գիվի Հովհաննիսյանը մեր թղթակցի հետ զրույցում հաստատել է, որ գործում առկա են իր պաշտպանյալին սատարող ստորագրություններ:

Սերոբ Տեր-Պողոսյանի՝ Լոռու մարզի ընդհանուր իրավասության դատարանում ընթացող դատը դռնփակ է, եւ լրագրողները զրկված են այն լուսաբանելու հնարավորությունից: Տուժողները Ախթալայում բնակվող պատանիներ եւ երիտասարդներ են, եւ նրանց ծնողները դատարանում ոչ միայն Սերոբ Տեր-Պողոսյանի դեմ բողոք չեն ներկայացնում, այլեւ նրա հասցեին գովեստի խոսքեր են շռայլում ու շնորհակալություն հայտնում՝ իրենց ֆինանսապես օգնելու համար:

Դատավարությունը ներկայումս գտնվում է տուժողների հարցաքննության փուլում: