Դավութօղլուին կոշտ ուղերձներ են հղել

Քաղաքագետ Ռիչարդ Կիրակոսյանը, ով 5 հոգանոց պատվիրակության կազմում հանդիպում է ունեցել Թուրքիայի արտգործնախարար Ահմեդ Դավութօղլուի հետ, այսօր լրագրողների հետ հանդիպման ժամանակ հայտարարեց, թե այդ հանդիպումն անակնկալ է եղել, քանի որ նախօրոք տեղեկացված չեն եղել: Միայն հասցրել են Հայաստան նամակ ուղարկել եւ կառավարությանը տեղյակ պահել դրա մասին:

Ռիչարդ Կիրակոսյանի խոսքերով` իրենք Դավութօղլուին երեք հիմնական ուղերձ են հղել:  Առաջինը եղել է այն մասին, որ  հենց Թուրքիան է կանգնեցրել հարաբերությունների նորմալացման գործընթացը, եւ այժմ բեռի ողջ ծանրությունը հենց նրա ուսերին է, իսկ Հայաստանի համբերությունն էլ անսպառ չէ:  Քաղաքագետի փոխանցմամբ` իրենք հասկացրել են, որ փակ սահմաններով էլ Հայաստանը չի մեռում:

«Երկրորդ կոշտ ուղերձը Հայոց ցեղասպանության խնդիրն էր: Մենք բացատրեցինք արտգործնախարարին, որ կա Հայաստանը եւ Սփյուռքը միավորող երկու խնդիր` Հայոց ցեղասպանության ճանաչումն ու Արցախի խնդիրը»,- ասաց Ռ. Կիրակոսյանը:

Նրա համոզմամբ` թուրքական քաղաքականության մեջ հնարավոր է փոփոխություններ տեղի ունենան, քանի որ նրանց ԱԳՆ-ում հայկական պատվիրակության անդամները կարողացել են քննադատել թուրքական` Ցեղասպանության հերքող քաղաքականությունը:

Իսկ երրորդ ուղերձը եղել է Արցախի խնդրի հետ կապված: Մերոնք թուրք պաշտոնյաներին հիշեցրել են, որ ստորագրված արձանագրություններով իրենք էլ ընդունել են, որ հայ-թուրքական հարաբերությունները չեն կարող փոխկապակցված լինել: