Փաշինյանը դրական ուղերձներ է հղել, բայց սահմանները կբացվեն, եթե Հայաստանը կատարի պայմանները. Չավուշօղլու

Թուրքիայի և Հայաստանի միջև մոտ ապագայում բանակցությունների հնարավոր մեկնարկի վերաբերյալ հարցին պատասխանելիս Թուրքիայի արտգործնախարար Մևլութ Չավուշօղլուն ադրբեջանական Report-ի հետ զրույցում պայմաններ է առաջադրել:

«Նիկոլ Փաշինյանը դրական ուղերձներ է հնչեցրել վարչապետ ընտրվելուց և կառավարություն կազմելուց հետո: Նախագահ Ռեջեփ Թայիփ Էրդողանը դրական է գնահատել դրանք: Սակայն հետագա քայլերի մասով մենք գործում ենք Ադրբեջանի հետ: Մեր ձգտումն է կարգավորել հարաբերությունները: Բնականաբար, այս հարցում կարևոր է քայլերի ձեռնարկում հենց Հայաստանի կողմից: Ադրբեջանը Հայաստանին առաջարկել է կնքել խաղաղության պայմանագիր: Կարծում եմ, որ օգտակար կլինի բանակցություններ սկսել նաև այս կապակցությամբ: Իհարկե, այս ուղղությամբ մենք քայլեր կձեռնարկենք Ադրբեջանի հետ համակարգված, և եթե պայմանները բավարարվեն, ապա Ադրբեջանն ու Թուրքիան կարող են բացել իրենց սահմանները, և այս դեպքում հարաբերությունները կկարգավորվեն: Սակայն այս հարցում Հայաստանը չպետք է սահմանափակվի բառերով, այլ պետք է ձեռնարկի արդյունավետ և իրական քայլեր», - ընդգծել է Թուրքիայի արտգործնախարարը: